LAOAG CITY – Nabirukanen ti tricycle ni Mr. Dante De Guzman, a residente iti Barangay Puyupuyan iti ili ti Pasuquin kalpasan a napukaw kabayatan ti panagiparking na iti pagperyaan iti nasao nga ili.
Segun kenni De Guzman, kalpasan a nagkamang iti Bombo Radyo Laoag ken naipatangatang ti pannakapukaw ti tricycle na ket nangeg dagiti residente iti Barangay Payas Burgos nga isu ti nakakitaan da iti daytoy.
Inlawlawag na a basar kadagiti residente iti Barangay Payas, dua nga aldawen nga adda ti tricycle iti nasao a lugar ken ti ammo da laeng ket nagluganan dagiti bisita ti nagminatay iti lugar.
Kunana nga idi naamoan da a ti birbiruken ni De Guzman a tricycle ket isu ti adda iti barangay da ket dagus da nga inpakammo iti Philippine National Police – Burgos ken naitawag met iti kapulisan iti Pasuquin.
Mainaig iti daytoy, kuna ni De Guzman a saan met a nagaraw ti kwarta nga adda iti tricycle na ngem maibusen ti gasolina daytoy a full tank sakbay a naitaray.
Nupay kasta, nagyaman daytoy gapo ta nabirukanen ti tricycle nga ipaspasada da.
Innayon na a gapo iti napasamak ket adda met ti adal a nasursuro na no sadinno mas ammo nan ti agannad nangruna ti saan a panangibati ti tulbek na.
Kabayatanna, nagyaman ni De Guzman iti Bombo Radyo Laoag, kapulisan ti Burgos ken Pasuquin ken kadagiti amin a timmulong kenkuana.
