LAOAG CITY – Inlawlawag ni Vice Mayor Rey Carlos Fariñas a saanen nga ipalubos ti konseho nga ipasa ti maysa a gakat iti maminpinsan a regular session.
Segun kenkuana, daytoy ket tapno ad-adda a matingiting a naimbag ti maputar nga ordinansa wenno resolusion sakbay a naan-anay a maaprobaran babaen kadagiti agpanpanday linteg.
Inbatadna a no awan laketdi naikeddeng nga urgency ti maysa a gakat ket nasken a masapul pay laeng a dumalan daytoy iti naiget a panangarisit.
Inpaganetget ni Fariñas a daytoy nga addangna ket kalpasan iti napasamak iti nagbalin a gakat ni Sangguniang Panlungsod Member Kiko Ang mainaig iti backyard slaughtering a naminpinsan a naipasa iti second, third and final reading ngem naibabawi met laeng iti kamaudiananna kalpasan a nakaawat ti adu a negatibo a komento maipanggep iti daytoy.
