LAOAG CITY – Nagpila ni Senador Francis Pangilinan ti maysa a gakat mangpatalged ti napalawa a voucher program para kadagiti agad-adal iti pribado a pagadalan manipod iti low-income ken middle-income households.
Iti babaen ti Senate Bill No. 1841 wenno ti “Private Education Voucher Expansions (PEVE) Act”, gagem na a palawaen ti masakupan ti tulong pinansyal para kadagiti underprivileged nga agad-adal manipod kindergarten agingga iti senior high school a mapilpilitan a sumrek iti pribado a pagadalan gapu iti panagdudupudop wenno kinakurang ti asideg iti lugar da a pampubliko a pagadalan.
Naipalaon pay iti gakat ti pannakaamendar wenno pannakaibasura iti sumagmamano a probisyon ti Republic Act No. 8545 wenno ti Expanded Government Assistance to Students and Teachers in Private Education Act.
Kabayatanna, nakailanad iti explanatory note ti gakat a makaawat ti voucher assistance dagiti agad-adal manipod iti middle-income families, maibasar iti klasipikasyon ti Philippine Statistics Authority (PSA) nga aggapo kadagiti pampubliko a pagadalan a dinakamat ti Department of Education (DepEd) kas congested, wenno dagiti agnanaed kadagiti lugar nga awan ti asideg a pampubliko a pagadalan ken kalikagom da ti agenrol iti pribado a pagadalan.
Naipalaon pay iti gakat a ti tulong kadagiti pribado pagadalan a makipaset iti programa ket maibasar iti quality assurance standards, karaman ti kalawa ti geographic coverage ken ti kaado dagiti agad-adal nga agenrol.
Maipalagip nga immunan nga inrubwat ti Department of Education ti classroom leasing initiative kas temporaryo a solusyon iti overcrowding kadagiti pampubliko a pagadaln bayat nga isaysayangkat ti konstruksyon kadagiti permanente a classrooms, karaman ti pannakatarimaan dagiti inupaan a pasilidad kadagiti lugar nga addaan ti problema iti panagala ti lote iti pannakaipalawa ti mabalin a pagipatakderan kadagiti classrooms.
