LAOAG CITY – Naglikudan ni Vice President Sara Duterte ti maipagarup a political plot a naawagan kas “Save the Queen” tapno agbalin a sumaruno a Presidente ti Pilipinas.
Inlawlawag ti Bise Presidente nga awan ti operator nga ipanagan iti operasionna no ania ti gagemna.
Inaramid ni Vice Pres. Duterte ti palawag idi saludsoden ti Bombo Radyo ti maikadua a Presidente no agatendar isuna iti sumaruno a panagdengngeg ti House Quad Committee inton Nobiembre 15 no bilang a maimbitaran isuna.
Namunganayan ti isyu iti maipagarup a Save the Queen plot kalpasan ti panangibutaktak ni dati a Bureau of Customs (BOC) intel officer Jimmy Guban iti House Quad Committee iti napalabas a lawas no sadinno nga inbutaktakna dagiti panangpapatay a mapaspasamak a naawagan ti Davao mafia ket tapno i-save ti queen tapno agbalin a sumaruno a Presidente.
Inbutaktak pay ni Guban a paset ti maipagarup a conspiracy ti kabsat ni Vice Pres. Sara a ni Davao City Rep. Paolo “Pulong” Duterte ken ti asawa ni Vice Pres. Sara a ni Mans Carpio.
Kabayatanna, nupay saan nga innaganan ni Guban ti dakdakamatenna iti statement kadagiti immuna a panagdengngeg ti komite seknan iti Save the queen plot idi kwestionaren ni Zambales Rep. Jay Khonghun no dagiti Duterte ti itudtudona gapu ta kasapulan pay nga urnosen ti affidavit-na ken gapu ta seguridad ti pamilia ti mapagsasaritaan iti daytoy.
