LAOAG CITY – Kinumpirmaran ti National Security Council (NSC) a positibo iti makasabidong a kemikal a cyanide dagiti yellow a botelya a narekobre manipod iti Chinese boats nga agop-operar iti asideg ti BRP Sierra Madre iti Ayungin Shoal.
Segun ken ni NSC spokesperson Cornelio Valencia Jr., narekobre ti Philippine Navy dagiti nasao a botelya idi Pebrero 20 ken Oktubre 24, ti napalabas a tawen.
Naipadalan dagitoyen iti panangtingiting ti National Bureau of Investigation Forensic and Scientific Research Service.
Segun iti konseho, ti presensiya ti cyanide iti lugar ket mangipangato ti seryoso a panagamak kadagiti aktibidad a mabalin a mangikabil kadagiti Philippine Navy personnel iti risgo kasta pay ti pagbiagan dagiti mangngalap a Pilipino.
Nagballaa met ti NSC official a dadaelen ti cyanide ti coral reefs iti lawlaw ti shoal, a mabalin a makaapektar iti structural stability ti BRP Sierra Madre.
