LAOAG CITY – Umabot ti 168 nga Overseas Filipino Workers (OFWs) iti pagilyan a Cambodia ti napukawan ti trabaho gapu iti coronavirus ken pinili da ti nagawid ditoy Pilipinas.
Daytoy ti report ni Bombo International Correspondent Aaron Arenas Antonio, taga Batangas ngem agdama nga agnanaed idiay Cambodia.
Segun ken ni Antonio, karaman kadagiti nagawid ditoy pagilyan nga OFWs ket mangisursuro idiay Cambodia, factory workers, ken dadduma pay.
Inlawlawag ni Antonio a dagiti nagawid nga OFW ket napukawan ti trabaho gapu iti covid-19 ken awan ti pangsuporta da ti kasapulan da isut gapuna a kinaykayat dan ti nagawid ditoy pagilyan.
Nupay kasta, kuna ni Antonio a mabalin to met laeng nga agsubli iti nasao a pagilyan dagiti nagawid nga OFW ditoy Pilipinas kalpasan ti mapaspasaran a krisis gubuay ti covid-19.
Kabayatanna, inpasingked ni Antonio nga awan dagiti Pilipino a natamaan ti virus idiay Cambodia.
Iti agdama, nakairekorden ti Cambodia ti 122 a kaso ti covid-19 ken 119 ditoy ti nalainganen manipod iti nasao a sakit.
