LAOAG CITY – Nagnegatibo ti resulta dagiti 18 nga indibidual a dimmalan iti Human Immunodeficiency Virus wenno HIV screening ditoy siudad ti Laoag.
Daytoy ti inpakaammo ni Dr. Rodrigo Catcatan, mangidadaulo ti City Health Office ditoy siudad.
Segun kenkuana, ti kangrunaan a dimmalan iti HIV screening ket dagiti Guest Relations Officer wenno GROs pakairamanan dagiti sumagmamano a kameng ti Lesbian, Gay, Bisexual, Transgender and Queer wenno LGBTQ Community.
Inbatadna nga adda pay ti pannakaibunong ti condom kadagiti dimmalan iti HIV screening tapno maliklikan iti nasao a sakit ken agtalinaed a nasalun-at dagitoy.
Kabayatanna, kuna ni Dr. Catcatan nga agtultuloy ti information education campaign tapno maballaagan ti publiko no kasano a maala, malapdan ken maitrato a normal dagiti tao a positibo iti Human Immunodeficiency Virus.
