LAOAG CITY – Inlawlawag ni Mr. Reynaldo Pascua iti Barangay 29 ditoy ciudad ti Laoag ti naimatangan na a panangtagbat ni Joel Cabusi iti kayong na a ni Reynante Arimbuyutan.
Segun kenni Pascua, adda iti impluwensya ti nasanger da Arimbuyutan ken Cabusi idi napasamak ti insidente.
Ummuna iti daytoy, maipagarop nga adda ti nagubor iti balay ni Arimbuyutan a rason ti panagpungtot na ken nagsao-sao.
Inbatad na nga idi met rumwar isuna ket nakita na ni Cabusi a nabartek nga adda iti ruwar ti pagtaengan na ken mabalin nga agsisiim ken kalpasan ti sumagmamano a minutos ket nakita na nga inlayat ti suspek ti buneng na iti biktima.
Kuna ni Pascua a gapo iti panagamak na ket simrek iti balay da ngem idi lukatan na manen ti ridaw da ket addan ti suspek iti sango da ken nagpatulong nga ikali da ti biktima.
Innayon ni Pascua a nagpatulong ni Cabusi nga ikali da ti biktima kalpasan na a tinagbat ngem nagkedked dagitoy rason a nagsao ti dakes ti suspek.
Rumrumwar pay a ti biktima ket maipagarop a binagkong na ti suspek ti kallabes.
Kabayatanna, inbatad ni Mr. Randy Domingo a nakita na met a mismo ti panangtagbat ni Cabusi iti kayong na a ni Arimbuyutan.
Basar pay kadagiti tattao iti nasao a barangay, no mabartek ni Cabusi ket saan a napungtot ngem no makita na ni Arimbuyutan ket arig na agburburek ti dara na.
Kinumpirmaran pay ni Barangay Chairman Franklin dela Cruz iti nasao a barangay a no saan a makainom ti biktima ken suspek ket awan ti madi nga aramid da.
Nupay kasta, kuna ni dela Cruz a no nabarteken dagiti dua ket agbaliw ti ugali da.
