LAOAG CITY – Inaprobaranen ni Presidente Ferdinand Marcos Jr. ti panangiruar ti P700 million a pundo para iti pannakaipasdek ti child development centers kadagiti low-income municipality.
Daytoy ket kalpasan a kiniddaw ti early childhood development proponents ken ni Presidente Marcos a mangilatang ti pundo iti uneg ti sumaruno a tallo a tawen tapno maikkan ti access dagiti marigrigat a barangay iti early childhood education.
Iti sectoral meeting iti Malacañang kadua ti EDCOM 2 ken dadduma pay nga ahensia, insingasing ti Presidente nga aramiden a Child Development Centers dagiti daycare centers gapu ta agpada met laeng ti panagsanay kadagiti mangisursuro ken dagiti ubbing.
Nabilin dagiti maseknan nga ahensia a paaduen dagiti graduates iti kurso nga adda ti pakainaiganna iti early childhood education nangruna kadagiti rehion nga adda ti panagkurangda iti early childhood teachers.
Inbatad ni Education Secretary Sonny Angara, dakkel ti maitulong ti early childhood development initiatives iti pannakapasayaat ti kalidad ti edukasion iti pagilian.
Babaen iti daytoy, makissayan ti dropout rate ken ngumato ti completion rate ken literacy dagiti ubbing nga agad-adal.
