LAOAG CITY – Inlawlawag ni Solicitor General Menardo Guevarra nga awan pay ti naawatna nga aniaman a notice of communication manipud iti International Criminal Court (ICC) mainaig iti posible a warrant of arrest kontra ken ni dati a Presidente Rodrigo Duterte.
Inbatad ti opisial a ti Department of Foreign Affairs (DFA) ti official entry point para iti aniaman a notice of communication kas maysa daytoy a maipapan iti diplomatic courtesy.
Inaramid ti Solicitor General ti rakurak kalpasan nga inbatad ni Presidential Communications Office Secretary Jay Ruiz idi rabii ti Domingo nga adda ti nangngegda nga adda ti warrant of arrest a maipagarup nga inruar ti International Criminal Court kontra iti dati a Presidente para iti crimes against humanity ken kunana a nakasagana ti gobierno para iti aniaman a mapasamak.
Kabayatanna, immunan nga inrakurak ni Palace Press Officer Claire Castro nga uray nga inpasigurado ti kooperasion daytoy iti posible a panangarestar iti dati a Presidente ket inpettengna ti nagtalinaed a takder ni Presidente Ferdinand Marcos Jr. nga awan ti hurisdiksion iti Pilipinas ti International Criminal Court gapu ta nagikkaten ti pagilian iti international body idi pay laeng tawen 2019.
