LAOAG CITY – Naragsak nga inpakaammo ni Mr. Mario Nerez, Presidente ti Public Utility Jeepney iti ruta a Laoag-Gabu a dakkel a nayon iti panagpasada dagiti padana a Public Utility Jeepney drivers ti panaglukat ti SM ditoy siudad ti Laoag.
Segun kenkuana, apaman a naglukat ti dakkel a mall ket simmayaat ti panagpasadada gapu ta adu dagiti pasahero nga iluganda nga agturong iti sentro.
Inbatadna a malaksid iti bigat ken aldaw ket adda pay ti uppat a jeep nga agpasada iti rabii para kadagiti pasahero a naladaw nga agawid nga aggapu iti nasao a dakkel a mall.
Kunana a dumanon iti 13 a pisos ti plete dagiti pasahero manipud iti SM nga agturong iti sentro ditoy siudad ti Laoag.
Kabayatanna, kiniddawna ken ni Mayor-elect Bryan Alcid, Chairman ti Committee on Transportation a kitaen dagiti sumagmamano a tricycle driver nga agiluglugan ti pasahero iti saan a naikeddeng a lugar.
