LAOAG CITY – Inadmitir ni Department of Public Works and Highways Secretary Manuel Bonoan nga adda dagiti ghost projects kadagiti sumagmamano a distrito idiay Bulacan.
Iti imbestigasion ti Senate Blue Ribbon Committee, inarisit ni Senate President Pro Tempore Jinggoy Estrada ni Bonoan gapu iti arig a ghost projects idiay Calumpit, Malolos ken Hagonoy.
Ti contractor dagiti “ghost” flood control projects idiay Bulacan ket ti Wawao Builders a maysa kadagiti 15 a contractor a dinakamat ni Presidente Ferdinand Marcos Jr. a nakaala ti kaaduan kadagiti flood control contracts ti gobierno.
Naammoan nga idiay Bulacan laeng ket adda ti 85 a proyekto ti Wawao Builders nga agbalor ti 5 billion pesos ken pakabuklan a 9 billion pesos met iti intero a pagilian.
Inpasigurado met ni Bonoan nga agsungbat dagiti karaman iti anomalya no mapaneknekan dagiti ghost flood control projects.
Kabayatanna, kalikagum ni Estrada a maipatulodan ti subpoena ti akinkukua ti Wawao Builders a ni Mark Allan Arevalo para iti naun-uneg nga imbestigasion ti komite.
