LAOAG CITY – Inbatad ni Department of Public Works and Highways Secretary Manuel Bonoan saanna a baybay-an ti responsibilidad na a mangimbestigar ti maipagarop a panagkunniber kadagiti substandard wenno ghost flood control projects.
Inrakurak na daytoy kalpasan nga ado dagiti agpanpanawagan a bumaba iti pwesto kabayatan ti imbestigasyon kadagiti palpak ken maanomalya a flood control projects.
Iti video message a nakipost iti opisyal a Facebook page ti Department of Public Works and Highways, inpetteng ni Bonoan a nakasaksakit iti barukong nga awaten dagiti mapaspasamak iti babaen ti liderato na iti baet ti naiget ken istrikto a maipatpatungpal a pagannurutan kontra iti korapsyon.
Inpaganetget ni Bonoan a nakasagana nga agsungbat kadagiti maipagarop nga irregularidad iti ahensya ngem inpetteng na a saanna pulos a kunsintiren ti aniaman a klase ti korapsyon.
Binigbigna dagiti panawagan para iti panag-resign na ken kunana nga alisto daytoy nga aramiden ngem saanna a tallikudan ti problema a sangsangwen ti idaulwan na nga ahensya.
Innayon na a saan nga iti ipapanaw wenno panangliklik ti responsibilidad ti usto a wagas ti panagbiruk ti solusyon.
Maipalagip a sumagmamano nga indibidual ken agpanpanday linteg dagiti nanggutigot iti kallabes ken ni Bonoan a nasaysayaat no agresign’en kas mangidaulo iti Department of Public Works and Highways kalpasan a personal a napan binisita ni Presidente Ferdinand Marcos Jr. ti agbalor ti P55-million a river wall project iti Barangay Piel, Baliwag, Bulacan, no sadinno a naduktalan a saan pulos a narugyan idinto a naireport a nakumpleton daytoy.
