LAOAG CITY – Nabayagen a “Full Disclosure Policy (FDP) Compliant” dagiti amin a Local Government Units ditoy Ilocos Norte pakairamanan ti gobierno probinsyal.
Daytoy ti inpannakkel ni Atty. Gerald Gallardo, provincial director ti Department of Interior and Local Government (DILG) ti Ilocos Norte.
Segun kenkuana, paset daytoy ti “Good Financial Housekeeping” ken dakkel a banag ti panagtulnog dagiti LGU iti FDP iti panangkita ti DILG kadagiti mapadayawan iti “Seal of Good Local Governance Awards”.
Inlawlawagna a napateg ti pannakaipatungpal ti “full disclosure” gapu ta babaen iti daytoy ket magesdan no saan man a maminpinsan a malapdan ti panagkunniber ken ti saan nga umiso a pannakausar ti pundo ti gobierno.
Makatulong pay daytoy a mangiyammo kadagiti umili no ania dagiti “available” a public funds ken ti nailatang a pundo para kadagiti “development projects iti bukud dagitoy a lugar ken makatulong a mangitandudu iti kinapudno, “transparency” ken ti naurnos a pannakaimaneher ti “public funds”.
Mainaig iti daytoy, inpadanon ni Gallardo ti panangkablaawna kadagiti amin nga LGUs ditoy probinsia iti pannakamantenerda iti panagbalinda a “Full Disclosure Policy Compliant”.
