LAOAG CITY – Maysa ni dati a Department of Environment and Natural Resources (DENR) Secretary Roy Cimatu kadagiti kangrunaan a naimbitaran iti panagdengngeg ti House Public Accounts Committee inton Nobiembre 19 mainaig iti Manila Bay Dolomite Beach project.
Inpetteng ni Bicol Saro Partylist Rep. Terry Ridon, nasken nga agpalawag ni Cimatu maipanggep iti Manila Bay Dolomite Beach project.
Inbatad ni Ridon, tingitingenda ken ni Cimatu no kasano a nangrugi ti proyekto ken no apay a naipatungpal uray saan met a paset ti Manila Bay Sustainable Development Master Plan ken saan a pabor iti pammilin ti Korte Suprema mainaig iti rehabilitasion ti Manila Bay.
Kuna ni Ridon a kas dati a sekretario ti Department of Environment and Natural Resources, ni Cimatu ti addaan ti kangrunaan a responsibilidad iti Manila Bay rehabilitation pakairamanan ti panangaramid ken panangipatungpal ti Manila Bay Dolomite Beach project.
