LAOAG CITY – Inbutaktak ni Department of the Interior and Local Government (DILG) Secretary Jonvic Remulla ti maipagarop a panaglemlemmeng ni dati Bureau of Corrections (BuCor) Director General Gerald Bantag iti kabanbantayan iti Cordillera Administrative Region.
Ti dati nga heneral ti maitudtudo a mastermind iti pannakapapatay iti beterano a broadcaster a ni Percy Lapid, addan ti sumagmamano a tawen ti napalabas.
Iti maysa nga interview, inbatad ni Remulla a ni Bantag ket prot-protektaran dagiti lokal a tribo kadagiti lugar a paglemlemmangan na.
Kuna na a saan nga agus-usar ti cellphone ti dati nga opisyal ket umakar-akar ti pagnanaedan iti nasao a rehiyon a saan nga agus-usar kadagiti behikulo.
Iti agdama ket adda ti P2 million a reward money para iti pannakaarestar ni Bantag.
Daytoy ket immunan nga indiaya ti Department of Justice (DOJ) ken ti National Bureau of Investigation (NBI) idi pay Hunyo 2023, agarop maysa a tawen sipud nasuspenso ni Bantag kas chief ti Bureau of Corrections.
