LAOAG CITY – Inpakaammo ni Dr. Alan Taylan, ti St. Camillus De Lellis Hospital ditoy siudad ti Laoag a posible nga umabot iti tallo nga aldaw agingga iti dua a lawas ti epektona dagiti makaptan ti Nipah virus.
Segun kenkuana, nabayagen ti Nipah virus gapu ta idi 1999 ket adda ti naipatungpal nga outbreak idiay Malaysia ken Singapore no sadinno a kadagupan kadagiti agarup 300 a nakaptan ti virus ket 100 ditoy ti pimmusay.
Inbatadna a rumrummuar a naggapu iti kurarapnit ti Nipah virus a napan kadagiti baboy a nagsakit pay dagiti agtartaraken kadagitoy.
Inlawlawagna a limmawa pay dagiti naapektaran a pagilian kadayta a panawen kas iti Bangladesh, India ken ditoy Pilipinas.
Kunana a ti asinoman ti makapasar ti nakaro nga epekto ti Nipah virus ket mabalin a lumteg ti utekna no mabaybay-an ti pasiente.
Mainaig iti daytoy, dagiti kangrunaan a sintomas ti nasao a virus ket kasla met laeng iti trangkaso, panaguyek, panaggurigor, panagsakit ti ulo, agpaparaw ken marigatan nga umanges.
Inpettengna a no mabaybay-an daytoy ket mabalin a makapasar ti pasiente ti kritikal a kondision kas ti agang-amangaw, agul-ulaw ken agkissiw.
Gapu iti daytoy, binalakadan ni Dr. Taylan ti publiko nga ugalien nga agbuggo ken agusar ti facemask kas proteksion iti bagi kontra iti makapatay a virus.
Innayonna a maluksaw daytoy gapu ta awan pay ti naan-anay nga agas para iti nasao a virus.
Kabayatanna, bayat a maisursurat daytoy a damag ket awan ti nairekord ti Department of Health a nakaptan ti Nipah virus ditoy Pilipinas.
