LAOAG CITY – Nagtitipon dagiti Population Development Officers manipud kadagiti nagduduma a Local Government Units (LGU) iti Region 1 para ti Leadership Training.
Daytoy ti inpakaammo ni Mrs. Janet Retamal, mangidadaulo iti Commission on Population Office ditoy ciudad ti Laoag.
Segun kenkuana, ti kangrunaan a gagem ti aktibidad ket iti ad-adda pay a pannakapapigsa ken pannakaiyadal dagiti nagduduma a programa para iti pagsayaatan ti komunidad ken dagiti umili.
Mainaig iti daytoy, kunana a nagatendar pay ni Governor Cecilia Araneta-Marcos a nangipasingkedan na ti suporta na kadagiti programa mainaig ti Population Development.
Kunana a ti kangrunaan a prayoridad da ket ti pannakaiyadal ti pananglapped ti teenage pregnancy, napintas a sistema ti Local Government Unit, barangay, health services ken nagduduma pay a sistematiko a programa para kadagiti umili.
Kabayatanna, kuna ni Retamal a dakkel a banag daytoy a training ditoy ciudad ti Laoag gapu ta makita ken maadal dagiti population development officers no ania dagiti mabalin a maiyimplementar tapno agballigi dagiti ipatungpal da a ganuat.
