LAOAG CITY – Immapela ni Ilocos Norte Electric Cooperative wenno INEC General Manager Perry Martinez iti National Electrification Administration a maipangato ti sueldo dagiti empleado ti kooperatiba.
Segun kenkuana, naobserbaranna a nababa pay laeng ti sueldo dagiti empleado ti kooperatiba nangruna kadagiti maibilang a field workers wenno linemen iti baet a naunday a panawenen nga agtrabtrabaho dagitoy.
Gapu iti daytoy, kunana a manarimaan ti panag-review ti National Electrification Administration ti plantilla position dagiti empleado ti kooperatiba tapno maiyannatop met laeng ti maipaay a sueldo kadakuada.
Inlawlawagna a nakita ti National Electrification Administration ti situasion iti panagsueldo dagiti empleado ti kooperatiba nga arig naabuso dagitoy iti nababa a sueldo.
Nupay kasta, inpasingked ni Martinez a maikorehir daytoy tapno maited ti rumbeng a maawat a sueldo dagiti agpapaay ti Ilocos Norte Electric Cooperative.
