LAOAG CITY – Inpakaammo ni Atty. Joel Gines, Provincial Commission on Elections Officer nga addan ti 11 a kandidato ti nangipila ti Certificate of the Candidacy iti opisinada para iti mapaspasangasangan a 2025 Midterm Elections.
Segun kenkuana, pakairamanan ditoy ti Gobernador, Bise Gobernador ken Sangguniang Panlalawigan Members.
Inbatadna nga iti agdama ket awan pay ti nangipila ti kandidatura para iti umuna ken maikadua a pannakabagi ti probinsia.
Mainaig iti daytoy, kuna ni Atty. Gines nga adda dagiti kameng ti pulisia nga agbanbantay iti Commission on Elections Office tapno maipasigurado ti kinatalged dagiti agpaidasig a kandidato.
Kabayatanna, inlawlawag ti Provincial Commission on Elections Officer a generally peaceful ti maikalima nga aldaw a pannakaipatungpal ti panangipila ti Certificate of Candidacy ditoy probinsia agsipod ta awan met dagiti dadakkel wenno seryoso a problema a timmaod.
