LAOAG CITY – Umabot ti agarop 70 a pamilya wenno 203 nga indibidual ti naipadalan iti a forced evacuation iti Barangay Pasaleng iti ili ti Pagudpud gapu ken ni bagyo Ramon.
Daytoy ti kinumpirmaran iti Bombo Radyo Laoag ni Police Capt. Edwardo Santos, ti chief of police ti nasao nga ili.
Segun ken ni Santos, dagiti naibakwit a residente ket agtalinaed da pay laeng iti Pasaleng Elementary School.
Inlawlawag na nga awan unay ti tudo iti nasao nga ili ngem nakapigpigsa ti angin isut gapuna a dadakkel dagiti allon ti baybay.
Kabayatanna, immapela ni Santos kadagiti umili a saan koman nga agbalin a natangken ti ulo da ken masapol nga agbakwit da no marikna da a dumegdeg ti sitwasyon.
