LAOAG CITY – Nalmes ti agtawen ti lima nga ubing a lalaki iti Barangay Santa Ana iti ili ti Solsona.
Segun ken ni P/Capt. Randy Damo, Hepe ti Solsona Municipal Police Station, basar iti inwayatda nga imbestigasion, agarup alas-11 ti bigat ket adda ti nakakita ti ubing nga agay-ayam pay laeng iti ruar ti pagtaenganda nga asideg iti irrigation canal.
Nupay kasta, apaman a simmangpet ti ama ti ubing iti pagtaenganda ket saanna daytoy a makita rason a napan nagsalsaludsod kadagiti karrubana ken nagsursor kadagiti mabalin a lugar a nagay-ayaman ti anakna.
Inbatadna nga adda dagiti tugot a sinurot ti ama ti ubing iti likud ti pagtaenganda a mabalin a naigalis ti ubing a nangitunda ti pannakatnagna iti irrigation canal agingga a ditoy a nakitana ti bangkay ti anakna.
Kunana nga adda ti sumurok-kumurang maysa a kilometro ti kaadayona manipud iti pagtaenganda ti nakakitaan ti ama ti awanen ti biagna nga anakna.
Innayonna a mamati ti pamilia ti biktima nga awan ti foul play a napasamak.
Kabayatanna, naammoan a ti ina ken lolo ti ubing ti adda iti pagtaengan ti biktima sakbay a nalmes daytoy.
