LAOAG CITY – Inlawlawag ni Mayor Fritzie Dela Cruz-Gapasin iti ili ti Bacarra a ti 14-days self quarantine a rumbeng a pagdalanan dagiti aggapo ballasiw taaw ket saanna a mandato no di ket protocol a mismo ti Department of Interior and Local Government (DILG).
Reaksyon na daytoy kalpasan nga adda dagiti mangibagbaga a mandato na ti pannakaipadalan ti self-quarantine dagiti kailian na nga aggapo iti ballasiw taaw kangrunaan na dagiti addaan ti kaso ti coronavirus.
Inbatad pay ti mayor nga awan ti dakes na no suruten ti nasao a pammilin tapno masigurado a saan a maapektaran ti covid-19 ditoy probinsya.
Mainaig iti daytoy, inpakaammo na a tapno mamonitor da a naimbag iti intero nga ili ti Bacarra ket nagpost iti social media kangrunaan na iti facebook account na ket immapela ti tulong dagiti kalugaran na babaen ti panangipakaammo da iti barangay kapitan da wenno iti opisina da no adda dagiti am-ammo wenno karruba da nga aggapo abroad.
Innayon ti mayor a saan laeng a dagiti aggapo Italy ti bisitaen da ken ag-self quarantine no di ket amin nga aggapo iti nagduduma a pagilyan.
