LAOAG CITY – Nagun-od ti maysa nga anak ti single mother ken manikurista a ni Engr. Gerald Ibarra ti Rank 10 iti kaliplippas a 2025 Chemical Engineer Licensure Examination.
Segun ken ni Engr. Ibarra, iti baet a naggapu daytoy iti broken family ket saan a nagbalin a tubeng ti panangigaedna ti panagadal.
Inbatadna a maymaysa ti inana a nangisakad kadakuada nga uppat nga agkakabsat no sadinno a sumsumrek daytoy iti parlor tapno agmanikurista.
Inlawlawagna a babaen iti daytoy ket masupusupan ti inada dagiti kasapulanda nga agkakabsat iti panagadal dagitoy.
Kunana a narigatan isuna iti panagrebyuna babaen ti online gapu kadagiti nagduduma a problem solving ken panangikabesa kadagiti formula.
Mainaig iti daytoy, inpakaammona a nursing ti immuna a priority course a kalikagumna nga alaen iti kolehio ngem gapu ta naammoanna a mabalin a pre-Medicine ti Chemical Engineering ket isu ti innalana.
Naammoan a buridek ni Engr. Ibarra kadagiti uppat nga agkakabsat ken nagturpos kas magna cum laude iti kurso a Chemical Engineering iti Mariano Marcos State University.
Kabayatanna, ni Engr. Ibarra ket nakagun-od ti rating a 86.20%.
