LAOAG CITY – Sumango iti kaso a panaglabsing iti Republic Act 9208 wenno Anti-Trafficking in Persons Act of 2003 ti babai a natiliw iti entrapment operation iti Barangay 1 San Roque iti ili ti Sarrat nga inyuswat ti National Bureau of Investigation (NBI).
Binigbig ni Agent Hilario Manding, ti mangidadaulo ti NBI ditoy ciudad ti Laoag ti suspek a ni Marianne Reyes Cacho alyas Maya ken residente iti ili ti Sarrat.
Segun kenni Manding, dua a babbai nga agtawen ti 27 ken 28 ti narescue da kabayatan ti inyuswat da nga operasyon.
Ummuna iti daytoy, kuna ni Manding nga idi Setyembre 29 ita a tawen ket adda ti intelligence report seknan iti panagibugaw ni Cacho kadagiti bbabai ken sipud idi ket naiyuswat metten ti surveillance agingga a natiliw da ti suspek.
Inlawlawag na a no tumawag kenni Cacho dagiti costumers ket isu met ti panangayab na kadagiti iggem na a babbai ken iti pwesto na a paglakoan ti barbecue ti pakaiyuswatan ti transaksyon.
Kuna pay ni Manding a 1500 a pisos agingga iti 10 a ribo a pisos ti bayad dagiti ibugbugaw na a babbai agdepende iti tawen dagitoy.
Rumrumuar pay nga adda ti iggem ni Cacho a menor de edad ngem idi rabii ket dua laeng ti naisalakan da.
Mainaig iti daytoy, kinumpirmaran ni Manding nga inadmitir ni Cacho kadakuada a naaramid na ti panagibugaw kadagiti babbai gapo iti kinarigat ti biag.
