LAOAG CITY – Kinumpirmaran ni Atty. Erme Labayog, legal counsel iti gobierno probinsyal nga adda dagiti nanggandat a mangserrek iti pagtaengan da iti Brgy. 50 Buttong ditoy ciudad ti Laoag.
Segun kenni Labayog, dua a nakaabungot a lallaki ti nakitana a nanggandat a sumrek iti balay da iti oras ti ala-una idi rabii.
Kunana a nakariing iti parbangon ken iti panagturong na iti kusinada tapno mapan uminom ket nadlaw na a nakalukat iti maid’s room ken nakalukat ti ridaw ken tawa na.
Inbatad na nga idi mapan na iserra ti tawa ket nakita na dagiti dua a nakaabungot a lallaki a ti maysa ket gawgaw-aten na ti bado na nga adda iti uneg ti balayda.
Innayon na nga idi nadlaw isuna dagiti suspek ket dagus dan a nagtaray nga immadayo.
Basar iti CCTV footage, sirsirpen dagiti suspek ti salas nga ayan dagiti kaannakan ni Labayog.
Kabayatanna, inbatad ni Police Lt. Col. Amador Quiocho, ti chief of police ditoy ciudad ti Laoag nga agtultuloy pay laeng ti imbestigasyon da tapno mabigbig ti kinasiasinno dagiti suspek.
Kuna na nga irebisar da a naimbag ti CCTV iti balay da Labayog ken mangnamnama da a masolbar da daytoy a kaso iti kabiitan a panawen.
