LAOAG CITY – Mamati ni Barangay Chairwoman Glenda Raquiño ti Barangay 34-A Gabu ditoy siudad ti Laoag nga adda ti maris pulitikana dagiti maibatbato a reklamo kontra kenkuana.
Daytoy ket kalpasan nga adda ti naipadanon ditoy Bombo Radyo Laoag nga adu a reklamo kontra iti Kapitana kas ti maipagarup a saanna a naipakaammo ti pannaka-renovate ti Barangay Hall-da iti Barangay Council, agsasao ti saan a napintas a sarita kadagiti padana nga opisial ti barangay, no apay a naikabil dagiti kagamitan ti Barangay Hall iti pagtaenganda ken no apay adda dagiti sumagmamano a residente ti saan a nakaawat ti resibo dagitoy apaman a nakaalada ti Barangay Clearance wenno dagiti sertipikasion.
Segun ken ni Kapitana Raquiño, nabayagen a naipakaammo iti Barangay Council ti planona a pannaka-renovate ti Barangay Hall-da isu a masdaaw daytoy no apay ita laeng nga agreklamoda ket idi pay napalabas a tawen a nangrugi ti renovation.
Inbatadna a kinasapulanda nga i-renovate ti Barangay Hall-da gapu ta agubo ti galba no dumteng ti panagtutudo a nangitunda ti pannakaperdi dagiti bobeda ken pannakadadael kadagiti tiles.
Inlawlawagna a saan nga agsasao daytoy ti saan a napintas a sarita kadagiti padana nga opisial gapu ta no dadduma ket agangaw laeng isuna.
Kunana a naikabil dagiti kagamitan ti Barangay Hall iti pagtaenganda gapu ta manarimaan ti renovation ken agpukaw dagitoy no maikabil laeng iti baba ti Barangay Hall-da.
Inpasingkedna a no adda ti agbulod ti tugaw ti barangay kas no adda ti minatayan ket nawayada a mapan iti balayda ken naka-record amin dagiti mabulod a kukua ti barangay.
Innayonna nga adda ti gundaway a naibusanda ti resibo isu’t gapuna no apay adda dagiti sumagmamano a residente ti saan a nakaawat ti resibo apaman a nakaalada ti Barangay Clearance wenno dagiti sertipikasion.
Nupay kasta, inpetteng ti Barangay Secretary ti Barangay 34-A Gabu ditoy siudad ti Laoag nga insigida met laeng a naited dagiti resibo kadagiti maseknan a residente apaman a nakaaladan ti baro a resibo manipud iti City Treasurer’s Office.
Kabayatanna, patien ni Kapitana Raquiño a saan pay a naka-move on dagiti kakaduana nga opisial ken adda dagiti atapenna nga adda iti likudan dagitoy a reklamo kontra kenkuana.
