LAOAG CITY – Naarestar ti maysa a barito kalpasan a nagtakaw ti sumagmamano nga alahas iti maysa a pagtaengan iti Barangay 11 Sta. Rosa iti ili ti Sarrat.
Basar iti Sarrat Municipal Police Station, ti suspek ket agtawen ti 18 ken awanan trabaho idinto a ti biktima ket agtawen ti 57, government employee nga agpada dagitoy a residente iti nasao met laeng a barangay.
Iti imbestigasion, kabayatan a mangisaysayangkat dagiti pulis ti mobile patrol ket nakaawatda ti tawag manipud ken ni Barangay Chairman Richard Agpaoa ti Barangay 11 Sta. Rosa iti ili ti Sarrat a nangipakaammo nga adda ti napasamak a panagtatakaw.
Mainaig iti daytoy, nagawid nga agmaymaysa iti pagtaenganda ti biktima ket ditoy a nariparna a ti main door iti pagtaenganda ket napuersa a nalukatan.
Naammoan a nakangngeg pay ti biktima ti tagari iti maikadua a kadsaaran ti pagtaenganda no sadinno a ditoy a nakitada ti suspek nga aglemlemmeng iti sirok ti katre.
Nakumpiskar manipud iti suspek ti dua a pares ti aritos, maysa a gold necklace, maysa a bracelet nga addaan ti uppat a rings ti diamond stones ken maysa a tulbek ti pagtaengan a mapapati nga inusar ti suspek tapno makastrek iti pagtaengan.
Kabayatanna, adda ti pakabuklan a 70 a ribu a pisos ti balor dagiti innala ti suspek a kagamitan ti biktima.
Iti agdama, nagtalinaed iti pagbaludan ti suspek ken manamnama a mapilaan ti kaso.
