LAOAG CITY – Dagus nga inreport ti maysa a baro a nakakita ti paltog ken bala iti abagatan a paset ti pagtaengan da iti Brgy. #4 Sta Maria, Vintar, Ilocos Norte.
Nabigbig daytoy a ni Mark Anthony Gali y Magabilin, agtawen ti 22, air-condition maintenance, ken residente iti nasao a barangay.
Naamoan a bayat a napan iti dati a junk-shop da ni Gali ket adda ti nakita na a pink a shoulder bag a naglaon ti home made shotgun ken tallo a bala ti nasao a paltog.
Segun kenni Police Major Joseph Baltazar, ti chief of police ti PNP-Vintar, saan da pay a nadeterminar no siasinno ti nangikabil iti bag a naglaon ti paltog ken bala.
Nupay kasta, inpasigurado na nga ikarigatan da nga ammoen no siasinno ti nangkabil ken no anya ti rason ti maseknan babaen ti panangireview da kadagiti CCTV footages.
Iti agdama ket addan iti kustudiyar ti PNP-Vintar ti paltog ken bala para iti naan-anay a disposisyon.
