LAOAG CITY – Inpakaammo ni Atty. Rex Ami, ti Provincial Director iti Civil Service Commission ditoy probinsia a posible a mapatawan ti pannusa a disciplinary action dagiti empleado ti gobierno a bastos ken sadot wenno dagiti saan a nasayaat ti panangakomodarda kadagiti agturong iti opisinada.
Inlawlawagna a pudno a saan a rumbeng a tumangsit dagiti empleado ti gobierno gapu ta mangipapaay dagitoy ti serbisio publiko kadagiti umili.
Nupay kasta, inpalgakna a saan nga umdas daytoy a rason tapno maikkat wenno maawananda ti panggedan dagiti maseknan nga empleado a natangsit.
Inbatadna a masapol a dumalan iti naan-anay a proseso ti napasamak iti nagbaetan ti empleado ti gobierno ken ti maseknan nga agrekreklamo tapno ditoy a matingiting a naimbag no asino ti nagbasol kadakuada.
Innayonna a mabalin a mangipasa ti complaint form iti opisina ti maseknan nga empleado ti gobierno tapno adda ti pormal a reklamo a maidanon iti Civil Service Commission.
Maipalagip nga inlungalong ni Senador Raffy Tulfo a mapatawan ti pannusa dagiti natangsit a government workers a saanda nga ar-aramidenda ti umiso a tranahoda.
Immuna iti daytoy, basar iti Senate Resolution No. 554 nga inlungalong ti agpanpanday linteg, mabalin a mapatawan ti nadagsen a pannusa dagiti bastos nga agpapaay ti gobierno.
Kuna ni Tulfo a masansan a mangmangngegna nga adda dagiti reklamo dagiti umili nga adda dagiti government workers a nagpabain, nagbastos, nagpukkaw ken saanda a tinulungan dagiti agpatpatulong iti opisina ti gobierno.
Naammoan a no bilang maipasa ti Anti-Taray Bill, posible a maikkat iti trabaho ken perpetual disqualification from public office dagiti bastos ken sadot a government workers.
