LAOAG CITY – Nagballaag ti Bangko Sentral ng Pilipinas – North Luzon Regional Office iti publiko tapno maliklikan a mabiktima ti peke a kuarta.
Segun ken ni Mr. Gomer Gomez, Bank Officer II ti Bangko Sentral ng Pilipinas – North Luzon Regional Office, maysa kadagiti kangrunaan a proseso tapno saan a mabiktima ti peke a kuarta ket babaen iti panangsurot ti feel, look and tilt procedures wenno no iggaman ti papel a kuarta ket masapol a nakirsang, agkarkarupa ti ladawan ti kuarta iti shadow image ken kitaen a naimbag ti security features daytoy.
Inbatadna nga adda ti criteria ti panangsukat ti kuarta kas ti panangkita ti size, signature ken security thread ti kuarta.
Kunana a mabalin a maisukat pay laeng dagitoy iti kaasitgan a Bangko Sentral ng Pilipinas laketdi kumpleto daytoy kadagiti nasao a tallo a criteria.
Kabayatanna, kuna ni Ms. Lourdes Laconsay, Bank Officer IV ti Bangko Sentral ng Pilipinas – North Luzon Regional Office a basar iti Presidential Decree 247 ket mabalin a mapatawan ti pannusa dagiti mapaneknekan nga indibidual a naglabsing iti daytoy a linteg no sadinno a mabalin a maibalod agingga lima a tawen ken mamulta ti agingga 20 a ribu a pisos.
