LAOAG CITY – Nagballigi ti naisayangkat a search warrant operation iti paset ti Sitio Saniata, Barangay 9, Lubnac iti ili ti Vintar.
Binigbig ni Police Capt. Suerte Ubongen, ti chief of police iti ili ti Vintar, ti subject ti operasyon a ni Marlon Agpaoa y Saguid, agtawen ti 40, awanan ti asawan ken residente met laeng iti nadakamat a barangay.
Inbatad ni Ubongen a nakumpiskar da iti balay ni Agpaoa ti maysa a Cal. 38 revolver nga addaan ti tallo a bala.
Ti naiserbi a search warrant ket inparuk-at ni Presiding Judge Francisco Quilala iti RTC Branch 14 ditoy ciudad ti Laoag gapu iti panaglabsing ti subject ti operasyon ti Republic Act (RA) 10591 wenno Comprehensive Law on Firearms and Ammunition.
Inlawlawag ni Ubongen a namonganay iti panangisayangkat da ti operasyon kalpasan nga adda dagiti report a maipagarop a tunggal mabartek ni Agpaoa ket ir-iruwar na ti paltog na.
Kabayatanna, inpetteng ni Agpaoa nga awan ti ik-ikutan na a paltog ken awan ti ipakpakita na tunggal mabartek.
Inadmitir na nga adda ti ik-ikutan na idi a maysa a shotgun ken maysa a kalibre 45 a paltog a dagitoy ket bagi ti uliteg na ngem naideposito da aminen isut gapuna na nga iti agdama ket awan pulos ti ig-iggaman na a paltog.
Awan metten ti nakairamramanan ni Agpaoa a sabali a reklamo wenno kaso.
