LAOAG CITY – Agur-uray laengen ti Commission on Elections (Comelec) ti pormal a surat manipod iti Kamara de representantes mainaig iti panagikkat ni ACT-CIS party-list Representative Edvic Yap.
Inbatad ni Commission on Elections Chairman George Erwin Garcia a ti surat para iti deklarasyon ket mangipaay ti gundaway iti ahensya nga opisyal a ma-certify ti party-list nominee a mangsukat ken ni Yap.
Kiniddaw ni Garcia, a masapol a maipatulod a dagus ti surat tapno makapagtignay nga insigida ti ahensya ken makapag-certify.
Ni Yap, a maysa kadagiti agpanpanday linteg a maipagarop a karaman iti flood control scandal, ket nagikkat iti puwesto kas miyembro ti kamara de representantes.
Iti babaen ti written communication, inpakaammo ni Yap iti plenaryo ti panagikkat nan iti pwesto ken naibasa daytoy iti sesyon idi Miyerkules, Pebrero 4.
Ti ACT-CIS party-list ket nakaala ti dua a tugaw iti 20th congress kalpasan a nakagun-od ti 1,239,930 boto iti napalabas nga eleksyon.
Iti agdama, ni Rep. Jocelyn Tulfo ti mangibagi ti party-list iti Kamara de representantes kadwa na ni Yap.
Ti listaan dagiti nominado ti ACT-CIS a naisumitir iti Comelec ket napanaganan ti Jeffrey Soriano kas maikatlo a nominado ti partido.
