LAOAG CITY – Nagballaag ni Atty. Joel Gines, Provincial Election Supervisor ti Commission on Elections ditoy probinsia kadagiti national candidates kageddan ti umuna nga aldaw a panagkampania dagitoy.
Inbatadna nga ita nga aldaw a naan-anayen a nangrugi ti campaign period para kadagiti national candidates ket pormal met dagitoyen a maikonsiderar kas maysa a kandidato.
Inlawlawagna a no maipapan kadagiti campaign materials ket naiget a maipatungpal ti 8 ½ by 14 inches a rukod dagitoy no sadinno ti mabalin a kadakkelan ket 4 feet by 8 feet.
Kunana a mabalin ti 3 feet by 8 feet ti maysa a campaign material ngem nasken a maikkat iti uneg ti 24 nga oras kalpasan ti naiwayat a campaign rally.
Mainaig iti daytoy, inpakaammo ni Atty. Gines a dua laeng ti mabalin a pangikabilan kadagiti campaign materials dagiti maseknan a kandidato, ti private area ken ti common poster area.
Naammoan a ti private area ket nasken nga adda ti pammalubos ti akinkukua ti daga idinto a ti common poster area ket maysa a public place nga inkeddeng ti Commission on Elections.
Naiget a maipawil ti panangikabil kadagiti campaign materials kadagiti pagadalan, waiting shed, kayo, poste, public building ken dadduma pay.
Mabalin a maikabil ti campaign material ti maysa a kandidato kadagiti private vehicles ngem maipawil para kadagiti government vehicles.
Innayonna nga ita nga aldaw ket rinugiandan ti pannakaiwayat ti Operation Baklas a nagsalungasing iti ipatpatungpalda a pagalagadan.
Kabayatanna, nagballaag pay ti Provincial Election Supervisor iti publiko seknan iti vote buying ken vote selling.
