LAOAG CITY – Inyistorya ti maysa a construction worker a mangimanmando ti trapiko iti matartarimaan a kalsada iti ili ti San Nicolas ti nagbalin a kapadasan na manipod kadagiti sumagmamano a kameng ti PNP iti ili ti Dingras.
Inlawlawag iti Bombo Radyo Laoag ni Mr. Richard Taylan a taga ili ti Dingras, kabayatan ti panangimando na ti trapiko ket ado dagiti pinagsardeng na karaman ditoyen ti patrol car ti PNP-Dingras a nagluganan dagiti lima a pulis.
Nupay kasta, maipagarop a kinagura daytoy dagiti nakalugan gapu ta inayaban da daytoy, pinaikkat da ti abungot na, ken kwinestyunaran ti maysa no apay a pinagsardeng na ida idinto nga adda ti kamkamaten da.
Inbatad na pay a maysa kadagiti nakalugan a pulis ket inkasaan na ti paltog ken inbaga na a nakapangpangas nga agtrap-trapiko.
Gapu iti daytoy, inadmitir ni Taylan a nakarikna ti nakaro a nerbiyus isut gapuna a nagpadespensar lattan daytoy.
Kabayatanna, kinumpirmaran ni Police Major Ryan Retotar, ti chief of police iti ili ti Dingras a maysa isuna kadagiti nakalugan iti patrol car a pinagsardeng ni Taylan.
Naglikudan met ni Retotar ti naibaga ni Taylan a kinasaan ti maysa a kadwa da a pulis ti paltog ken kwinestyunaran da no apay a pinagsardeng na ida idinto nga adda ti kamkamaten da.
Innayon na a pinaikkat da laeng ti abungot na tapno mabigbig da kangrunaan na ket pinagsardeng na ida kalpasan na ket nagkatkatawa ti maseknan.
Nupay kasta, inpasingked ni Taylan a saanna a kinatkatawaan dagiti pulis a nakalugan iti patrol car.
Inbalakad ni Retotar ken ni Taylan nga agpila lattan ti reklamo tapno isuti sungbatan da.
