Agtitinnulong ti Department of Agriculture (DA) ken Department of Trade and Industry (DTI) tapno ad-adda a mapasayaat ti agricultural exports ti Pilipinas, ken mataming dagiti lapped iti merkado.
Nagpirma dagiti dua nga ahensia iti Memorandum of Agreement (MOA) a nairanta a mangpaadu iti export sales dagiti basic commodities.
Karaman ditoy ti sabong, mangga, ken seaweeds, ken maitandudo pay dagiti apit a nangato ti pategna kas iti kape ken cacao.
Segun ken ni Agriculture Secretary Francisco Tiu Laurel Jr., panggep met ti partnership a mapapigsa ti posision ti pagilian kadagiti international markets.
Idi Setiembre 2024, dimmanon ti agro-based exports iti US$492.6 million wenno 8% iti dagup nga exports ti Pilipinas, segun iti Philippine Statistics Authority (PSA). Karaman iti nasao nga inisiatiba dagiti maseknan iti pribado a sektor, pakairamanan ti Philippine Exporters Confederation, Inc., ken ti Philippine Food Processors and Exporters Organization, Inc.
