LAOAG CITY – Dakkel ti simmayaatan ti pinansial pakairamanan ti serbisio ti Ilocos Norte Electric Cooperative wenno INEC ita a tawen no maidasig kadagiti kallabes a tawen.
Daytoy ti inpannakkel ni Mr. Cipriano “Perry” Martinez, Assistant General Manager ti Ilocos Norte Electric Cooperative kabayatan ti panangipaayna ti mensahe iti “yearend thanksgiving party” dagitoy ita a tawen 2025.
Mainaig iti daytoy, inpadanonna ti panagyamanna kadagiti amin nga agpapaay iti kooperatiba kangrunaanna kadagiti “linemen.”
Inbatadna nga amin a simmayaatan ti Ilocos Norte Electric Cooperative ket gubuay ti napintas a panagtitimpuyogda nangnangruna kadagiti “linemen.”
Kunana a maysa kadagiti nadadaelda a “record” iti INEC ti kapaut ti pannakaisubli ti serbisio ti kuriente no adda ti agdadael a linia nangnangruna iti isasaplit dagiti napipigsa a bagyo.
Inpaayna nga ehemplo ti pannakabael dagiti “linemen” a nangisubli ti serbisio ti kuriente iti uneg ti 14 nga oras ken iti isasaplit ti napigsa a bagyo Nando iti uneg ti tallo nga aldaw nangnangruna iti “Area 4”.
Inlawlawagna nga adda dagiti gundaway a kayatna nga ipagpannakkel nga adu dagiti simmayaatan ti Ilocos Norte Electric Cooperative gapu iti kinalaingna.
Nupay kasta, inpettengna nga uray kasano ti kapintas dagiti planona ken uray ammona dagiti rumbeng a maipatungpal ket awan ti serserbina no awan dagiti “linemen” ken dagiti dadduma pay nga empleado ti Ilocos Norte Electric Cooperative a mangipatungpal.
