LAOAG CITY – Natiliw ti maysa a designer a kameng ti LGBT Community iti naisayangkat a drug iti Barangay 17 ditoy ciudad ti Laoag iti panangidaulo ni Police Lt. Col. Rafael Lero, ti chief of police ditoy ciudad.
Nabigbig ti subject ti operasyon a ni Jessie Centeno, agtawen ti 46, kameng ti LGBT Community ken residente iti Barangay 22 ditoy ciudad ti Laoag.
Naamoan a ni Centeno ket simmangpet laeng ditoy Pilipinas idi Oktubre 2019 kalpasan ti 18 a tawen na iti SAudi Arabia kas designer.
Iti interview ti Bombo Radyo Laoag ken ni Centeno, inpetteng na a saanna a kukua ti naala kenkuana nga illegal a droga ken inpasingked na a saan nga aglaklako iti daytoy.
Inamitir na a nagus-usar iti illegal a droga ngem idi pay pebrero ita a tawen nga insardeng na.
Inbaga na nga adda ti nangawis kenkuana a mapan na kitaen ti pwesto iti asideg ti DENR ken iti panagawid na ket adda ti nangpara ti nagluganan na a tricycle isut gapuna a nasdaaw iti pannakaakusar na a naglako ti illegal a droga.
Nakumpiskar dagiti otoridad ti dua a sachet a naglaon ti maipagarop a shabu no sadinno a ti maysa kadagitoy ti maibagbaga nga inlako ni Centeno nga agbalor ti sangaribo a pisos.
Atapen ni Centeno a dagiti am-ammo na nga immunan a natiliw gapu iti illegal a droga ti nangpatiliw kenkuana.
Kabayatanna, inbaga ni Police Lt. Col. Lero a nabayagen a monmonitoren dagiti otoridad ti illegal nga aktibidad ni Centeno.
Innayon na a nalawa metten ti masakupan ni Centeno ngem naannad daytoy kadagiti illegal nga aktibidad na.
