LAOAG CITY – Inbatad ni Department of Justice Secretary Jesus Crispin Remulla nga ipresentar dagiti otoridad ti baro a testigo iti kaso dagiti nagpukaw a mammallot iti kabiitan a panawen.
Kuna ni Remulla a ti baro a testigo ket ad-adda a mangpabileg iti kredibilidad ti whistleblower a ni Julie “Dondon” Patidongan alias Totoy.
Inpalgak ni Remulla a ti dakdakamaten na ket saan laeng a testimonial evidence no di ket adda pay ti real evidence nga involved iti daytoy.
Innayon na nga adda ti pudno nga ebidensya iti daytoy malaksid iti istorya.
Maipalagip nga immunan nga inbutaktak ni Patidongan nga umabot ti nasurok a 100 a mammallot ti nakidnap, napapatay ken naibelleng iti Taal lake.
Kabayatanna, pormal metten a naipila ti National Police Commission (Napolcom) dagiti kaso administratibo kontra kadagiti 12 nga aktibo a pulis a maitudtudo a karaman iti panagpukaw dagiti mammallot.
Naamoan a dagiti nasao a kaso ket para iti grave misconduct, irregular performance of duty, ken conduct unbecoming of a police officer.
Nangipaay met ti National Police Commission iti lima nga aldaw kadagiti pulis para iti panagpila da ti counter-affidavit.
