LAOAG CITY – Pormalen a nadutukan ni Dr. Rickson Balalio kas mangidadaulo iti Provincial Health Office.
Daytoy ket babaen iti Draft Provincial Resolution No. 2024-05-285 a naipasa iti maikadua ken maudi a pannakaibasana kabayatan ti naiyuswat a regular session iti Sagguniang Panlalawigan.
Mainaig iti daytoy, inpeksa ni Dr. Balalio iti napalaos a panagyamanna iti gobierno probinsial nangruna ken ni Gov. Matthew Marcos Manotoc pakairamanan dagiti kameng ti hunta probinsial.
Inbatadna a saanna a ninamnama a dumanon a magun-odna iti agdama a puestona gapu ta nangrugi laeng daytoy kas Municipal Health Officer iti ili ti Nueva Era.
Inpasingkedna nga aramidenna amin ti kabaelanna tapno mapapintas ken mapasayaat pay ti pannakaipadanon ti serbisio medikal para kadagiti umili.
Kunana nga awan met pay ti direktiba ti gobernador kenkuana no ania dagiti kalikagumna a maipatungpal kabayatan ti panagtakemna iti nasao a posision.
Inlawlawagna a silulukat daytoy iti aniaman a singasing kenkuana laketdi pagimbagan ti kaadduan ket para iti panagdur-as iti benneg ti salun-at ditoy probinsia.
Immuna iti daytoy, inpadanon dagiti kameng ti Sangguniang Panlalawigan ti nabara a panangkablaawda kenkuana.
