LAOAG CITY – Nagpila ti Office of Public Counsel for Victims (OPCV) ti International Criminal Court (ICC) ti rekomendasion ti dua nga eksperto iti neuropsychology a mangbukel iti baro a panel a mangkita iti mental health ni dati a Presidente Rodrigo Duterte tapno maamoan no rumbeng a sumango iti padangengeg.
Iti lima a panid a dokumento a naipila idi Nobiembre 10, 2025, kuna ni Paolina Massidda, Principal Counsel ti OPCV nga addaan iti umdas a credentials ken kapadasan dagiti dua a nairekomendar a mangkita kenni Duterte.
Segun iti Office of Public Counsel for Victims, pinilida dagiti eksperto maibasar iti kualipikasion ken kabaelanda, pakairamanan ti kinalaingda iti Ingles ken ti lengguahe a nakaisuratan ti sumagmamano ummunan a medical findings kenni Duterte
Datin a nangdutok ti International Criminal Court ti tallo a miembro ti panel a bkbuklen ti maysa a forensic psychiatrist, maysa a neuropsychologist, ken maysa nga eksperto iti geriatric ken behavioral neurology.
Nupay kasta, kiniddaw ti kampo ni Duterte ti pannakaikkat ti maysa kadagiti eksperto gapo iti maipagarop a kinakurang ti kapadasanna ken posible a kaawan ti impartiality.
Iti mosion a naipila idi Nobiembre 7, inpetteng ni Atty. Nicholas Kaufman, lead counsel ni Duterte a rumbeng nga ibabawi ti Pre-Trial Chamber ti mandato ti eksperto ken saan a palubosan a mairaman iti listaan dagiti eksperto ti International Criminal Court.
Kas resultana, inbilin ti Pre-Trial Chamber I iti Registry a mangisubmitir ti baro nga shortlist dagiti eksperto iti neuropsychology.
