LAOAG CITY – Pursigido ni Mrs. Gina Galano ken ti abirat na a ni Mrs. Marivic Acoba a taga Barangay Cayubog iti ili ti Paoay a mangireklamo iti Internal Affairs Service (IAS) iti Police Provincial Office (PPO) kadagiti dua a kameng ti Philippine National Police (PNP) ditoy ciudad ti Laoag.
Daytoy ket gapu ta maipagarop a nagbalin nga arogante dagiti dua a pulis a nabigbig nga isuda Police Staff Sergeant Christoper Baleroso ken ni Patrolman Frizer Lungaya, agpada a kameng ti PNP-Laoag kabayatan ti papanda panangkuyug ti maysa a babai a nabigbig laeng iti nagan na a “Lea” a napan nagsingir ti pautang na a nasurok a 2 ribo a pisos ken ni Acoba iti nadakamat a barangay.
Inlawlawag ni Galano nga agarop alas-12:30am idi napan ti dua a pulis iti balayda tapno singiren da ti abirat na a dati a kadkadwa iti balay ni Lea.
Inpetteng ni Galano a ti saanna a maawatan ket no apay nga iti dis-oras ti rabii a napan nagsingir dagiti dua a pulis kadwa da ni Lea ken maipagarop a saan pay a napintas ti pannakisarita kadakuada dagiti maseknan.
Innayon na a saan a pulos a nakikoordinar dagiti dua a pulis iti PNP-Paoay ken uray ti kapitan iti barangay da iti papanda iti balay da isut gapuna a nagkedked da a sumurot agingga a saanna a natawagan ti ama iti barangay.
Naamoan nga umabot amin iti 2,125 a pisos ni Acoba kenni Lea, ken saanen a nagsubli ti balay ti naud-udi gapu ta marigatan iti trabaho na.
Inpakaammo ni Galano nga iti panagsasarita da iti kwerpo ti pulisya ket ti nagbalin a palawag ni Baleroso ket napan nagpatulong ni Lea kadakuada kabayatan ti panangiwayat da ti checkpoint iti Barangay Calayab ditoy ciudad ti Laoag ken adda ti inpakasarita ti babai iti cellphone a nagpabigbig iti nagan na nga Edison Bonoan no sadinno a maipagarop a binilin na dagiti dua a pulis nga asistiran da ti asawa na a mapan agsingir ti pautang.
Nupay kasta, iti pannakisarita ti Bombo Radyo Laoag ken ni Konsehal Edison Bonoan ditoy ciudad ti Laoag ket inpasingked na nga awan ti kinasarsarita na a kameng ti pulisya ken awan ti ammo na iti nasao a pasamak.
Kabayatanna, inpalgak ni Police Lt. Col. Rafael Lero, ti chief of police ditoy ciudad ti Laoag nga inbilin na iti Deputy chief of police da a pagpalawagen da dagiti dua a pulis mainaig iti papanda iti ili ti Paoay iti dis-oras ti rabii tapno agsingir ti pautang ti agnagan ti Lea.
Kuna pay ni Lero a saanna a patunuynuyan ti inaramid dagiti dua nga adda iti babaen na ken ginutigot na pay da Galano ken Acoba nga ipursige da ti agpila ti reklamo.
Basar pay kenni Lero, ti mabalin a maipila a reklamo kontra kadagiti dua a pulis ket administrative case nga agtungpal ti misconduct ken abandoning of post gapu inabandonar da pay ti naka-assign’an da.
Inpaganetget ni Lero a masapol a nagpakada koma nga immuna dagiti dua a pulis sakbay a nagturung da iti ili ti Paoay.
Inpalagip na a no kastoy a sitwasyon ket ti mabalin a pagpakadaan dagiti dua a pulis ket isuna kas chief of police ditoy ciudad ti Laoag, ken mabalin met ti deputy chief of police, duty officer ken ti Tactical Operation Center.
Inkari met ni Lero nga imbestigaren da pay a naimbag ken kumpirmaren da no siasinno ti ibagbaga dagiti dua a pulis a nakasarita da iti cellphone a nagpabigbig iti nagan nga Edison Bonoan no sadinno nga intudo na ti nagpatulong a babai a ni Lea nga asawa na.
