LAOAG CITY – Natay ti nakamotorsiklo kalpasan ti panagdinnungparda iti maysa met a motorsiklo iti Brgy. Napu iti ili ti Badoc.
Nabigbig ti biktima a nangiturong ti motorsiklo nga Honda Click 150 nga agmaris ti gray nga agtawen iti 43 ken residente ti Villa Welfare Area D, Camarin idiay Caloocan City ken ti kinalubbonna nga agtawen iti 37 ken residente ti Lot 46, Blk 16, Carissa 4A, Kaypian City of San Jose Del Monte, Bulacan.
Idinto a nabigbig met ti driver ti motorsiklo nga Euro nga agmaris ti nangisit nga agtawen iti 21 ken residente ti Brgy. Lacuben iti ili ti Badoc.
Basar iti Badoc Municipal Police Station, kabayatan a dumaldalyasat ti Honda Click 150 nga agpa-amianan ket kellaat a napukawan ti kontrol ti manibela idi nakitana ti maysa a Mitsubishi Estrada nga agmaris ti nalabbaga nga ag-left turn.
Gapu iti daytoy, naipurwak ti Honda Click 150 iti sabali a linya ti kalsada a nangitunda ti panagdinnungparda iti maysa pay a motorsiklo.
Naammoan a nagsagaba ti driver ken ti kinalubbon ti Honda Click 150 ti sugat iti nagduduma a paset ti bagida a dagus a naitaray iti Rural Health Unit iti ili ti Badoc ngem naideklara a dead on arrival ti driver daytoy.
Kabayatanna, segun ken ni P/Capt. Elison Pasamonte, Hepe ti Badoc Municipal Police Station, nakaruaren iti Rural Health Unit ti kinalubbon ti biktima ken ti kinadinnungparna.
Innayonna a basar iti pannakisarsaritana iti pamilia ti biktima nga awanen ti planoda a mangipila ti reklamo gapu ta admitarenda a basol ti biktima.
