LAOAG CITY – Dua nga ubbing ti natay idinto nga agarop 200 a sabsabali dagiti nasugatan kalpasan a nagdisso ken bimtak ti bomba iti asideg ti paediatric hospital iti ciudad ti El Fasher iti Sudan.
Napasamak daytoy kalpasan nga ad-adda pay a kimmaro ti rinnupak dagiti tropa ti Sudan ken ti paramilitary Rapid Support Forces nga agpada nga agkalikagom a mangkontrol iti ciudad.
Maipalagip nga addan ti nasurok a maysa a tawen ti rinnupak iti nagbaetan ti dua a grupo no sadinno a nasuruken a sangaribo dagiti pimmusay ken minilyon a residente ti napwersa a nagbakwit tapno maiyadayo da iti peggad.
Kinabaelan ti tropa ti Sudan a kontrolen ti El Fasher ngem ad-adda a ngimmato ti tension gapu iti panagkalikagom ti
paramilitary Rapid Support Forces a mangagaw ti nasao a siudad.
