LAOAG CITY – Nagpanawagan ti Estados Unidos iti Thailand ken Cambodia nga agsardengen iti rinnupakda.
Daytoy ket kalpasan nga addan ti 10 nga indibidual ti natay ken ginasgasut agingga iti rinibribu ti timmalaw gapu iti riribuk iti nagbaetan ti dua a pagilian.
Segun ken ni Secretary of State Marco Rubio, rumbeng laeng nga agtungpal ti dua a pagilian iti nakaipalaon iti katulagan nga inaramid ni United States President Donald Trump idi Oktubre.
Inbatad ni Trump a tumawag daytoy iti telepono kadagiti dua a pagilian tapno agsardengen ti rinnupakda.
Mainaig iti daytoy, binabalaw ti dua a pagilian iti tunggal maysa no sadinno a nagsinnukatda ti artillery fire a nangitunda ti pannakatay ti 10 nga indibidual idiay Cambodia ken tallo met manipud idiay Thailand.
Inrakurak dagiti opisial ti Thailand nga adda ti sumurok 400 a ribu nga indibidual ti naibakwitdan idinto nga inpakaammo ti Phnom Penh nga adda met ti 100 a ribu ti naiyakaren kadagiti shelter.
Inakusaran ti Cambodia ti Thailand iti panangiwayat ti “aggressive military attacks” a na-target-da dagiti civilian institutions, sacred cultural sites pakairamanan dagiti historic temples iti asideg ti pagin-innagawan a border.
Ita nga aldaw ti Mierkoles, inrakurak ti Cambodia nga agikkatdan iti South East Asian Games a maisaysayangkat idiay Thailand.
Dinakamat ti Cambodian National Olympic Committee ti seryoso a panagdanag ken panagkiddaw manipud kadagiti pamilia dagiti atleta daytoy para iti panag-withdraw no sadinno a daytoy a desision ket naiget a pinagpanunotanda.
Ginutigot ni United Nations’ Secretary-General António Guterres ti agsinnungbangir a partido nga agsardengen tapno maliklikan a kumaro pay iti nagbaetanda.
Kabayatanna, nangiruar ti ballaag ita a lawas dagiti sumagmamano a pagilian pakairamanan ti United Kingdom, Estados Unidos ken Japan mainaig iti panagbiahe kadagiti border areas ti Cambodia ken Thailand.
