LAOAG CITY – Maysa a fetus a nakaipan iti supot ti nadiskubre ti residente iti Barangay Caribquib iti ili ti Banna.
Segun kenni Police Staff Sergeant Marlon Pitpit iti PNP-Banna, nagreport kadakuada ti agnagan ti Michael Felipe idi rabii, kalpasan ti pannakadiskubre na ti fetus iti agarop alas-dose iti tengnga ti aldaw.
Inbatad na a napan ni Felipe iti pagbasuraan iti Sitio Saranay iti nasao a barangay ken ditoy a nakita na ti plastic sando bag ken nakigtot gapo ta fetus ti karga daytoy.
Inlawlawag na a kalpasan daytoy, nagawid ti maseknan iti pagtaengan da iti Barangay Fortuna iti Marcos ken nadlaw ti kabsat na nga agnernerbyos daytoy.
Naamoan a basar iti nakakita, saan na a dagus nga inpakammo ti fetus a nakita na gapo iti buteng na ken naladaw a nakaawid gapo iti napigsa a tudo.
Mainaig iti daytoy, kunana nga iti pannakikoordenar da iti Rural Health Unit (RHU), adda dagiti masikog iti nasao a barangay ngem awan ti agarop innem a bulan ti sikog na a kas iti nakita a fetus.
Kunana pay a ti nakakitaan iti fetus ket adayo iti balbalay ken asideg iti karayan.
Agtultuloy met ti imbestigasyon ti PNP-Banna tapno mabigbig no siasinno ti ina wenno ama ti fetus ken tapno saanen a maulit pay ti kastoy a pasamak.
