LAOAG CITY – Kalikagum ni Senador Sherwin Gatchalian a manayun ti bilang dagiti guidance designates kadagiti pampubliko a pagadalan tapno masolbar dagiti kaso ti bullying.
Inbatad ni Gatchalian, dagiti guidance designates ket dagiti mangisursuro met laeng nga addaan ti responsibilidad nga adda ti pakainaiganna iti guidance services.
Ibilang ti Senador a temporario laeng daytoy a solusion kabayatan a saan pay a naan-anay a nasolbar ti kinakurang dagiti guidance counselors kadagiti pagadalan.
Kiniddaw pay ti agpanpanday linteg a balbaliwan ti ideal ratio dagiti guidance designates wenno guidance counselor depende iti kadakkel ti pagadalan ken kinaadu dagiti agad-adal.
Iti agdama, iti kada 500 nga estudiante ket maysa a guidance designate wenno guidance counselor ti naidesignar.
Nupay kasta, kurang pay laeng daytoy gapu ta basar iti datos ti Department of Education (DepEd) iti 45,320 a pagadalan ket adda ti sumurok 10,400 met dagiti awanan ti guidance designates ita a tawen.
