LAOAG CITY – Nangdutuk ti International Criminal Court (ICC) Pre-Trial Chamber I kadagiti medical expert a mangtingiting iti kondisyon ken kabaelan ni dati a Presidente Rodrigo Duterte a makipaset kadagiti panagdengngeg mainaig iti alegasyon kenkuanan a crimes against humanity.
Basar iti dokumento a napetsaan ti Oktubre 9, inbilin ti ICC ti pannakdutuk ti multidisciplinary panel a bukbuklen dagiti eksperto iti forensic psychiatry, neuropsychology, ken behavioural neurology tapno maestablisar no ti sitwasyon ti salun-at ti dati a presidente ket makaapektar iti panangawat ken pannakipaset na iti proseso ti panagdengngeg.
Gagem ti addang ket tapno maamoan no maawatan ti dati a presidente ti gagem ket pangtungpalan ti kaso, ti ebidensya kontra kenkuana ken no kabaelan na ti mangipaay ti rakurak wenno makikoordinar iti abogado na para iti depensa na.
Basar met iti lead counsel ni Duterte a ni Nicholas Kaufman, maipagarop nga agpaspasar ti dati a presidente ti cognitive deficiencies ket marigatan a manglagip kadagiti pasamak, lugar ken uray ti sumagmamano a kameng ti pamilya na ken ti legal team na.
Gapu iti daytoy, nagkiddaw ti kampo ni Duterte ti “indefinite adjournment” wenno temporaryo a pannakaisardeng ti kaso, ngem nagkedkedan daytoy ti ICC, iti panagamak a mabalin a liklikan ni Duterte ti panangusig kenkuana gapu iti panangipangta na kadagiti testigo iti kallabes ken agtultuloy nga impluwensiya ti pamilya na iti pagilian.
