LAOAG CITY – Naglikudan ni chief legal counsel ken dati a pannakangiwat ni dati a Presidente Rodrigo ‘Digong” Roa Duterte a ni Atty. Salvador Panelo ti alegasyon ni dati a police colonel Royina Garma.
Daytoy ket mainaig ti maipagarop a panangimandar ni dati a Presidente Duterte ti panangidiaya ti gunguna para iti drug war killings ti administrasyon na iti pagilian.
Dinakamat pay ni Panelo ti sumagmamano a puntos a mangkwes-kwestyunar iti kinapudno na ti akusasyon ni Garma.
Kwinestyunaran pay ni Panelo ni Garma no kasano na a naamoan ti operasyon ti ‘war on drugs’ no saanna nga admitiren a nagbalin a paset daytoy, maysa nga operator, wenno executioner ti drug war model ti Davao.
Inpetteng ni Panelo a madlaw a ti impormasyon nga inpaay ni Garma ket tsismis laeng kangrunaan na ket maipagarop a daytoy ket naidanun laeng kenkuana ti sources na.
Maipalagip nga iti inyuswat a panagdengngeg ti House quad committee, inbatad ni Garma a kinontak isuna ni Duterte idi Mayo 2016 tapno maipagarop a mangbuwangay ti national task force para iti giyera kontra ilegal a droga, a kapada ti “Davao Model.”
Inlawlawag ni Garma a ti “Davao Model” ket maipagarop a mangdakdakmat iti sistema nga adda ti pakainaigan iti “payment” ken “rewards” no sadinno nga addaan ti tallo a lebel.
Agdudua pay ni Panelo kadagiti rakurak ni Garma gapu ta idi laeng Hulyo 2016 a nagtugaw ni Duterte kas mangidaulo iti Pilipinas.
