LAOAG CITY – Kinontra ti abogado ti negosyante a ni Charlie “Atong” Ang ti rakurak ni Interior Secretary Jonvic Remulla mainaig iti maipagarop a dandanin pannakaarestar ti kliyente na.
Daytoy ket mainaig iti kaso dagiti mapukpukaw a mammallot.
Segun ken ni Atty. Gabriel Villareal, dagiti rakurak ni Remulla ket iresponsable ken mabalin a mangikabil iti risgo ti biag ni Ang, aglalo ket ti panangiladawan da kenkun ket “armado ken napeggad.”
Inpetteng ti abogado a ti nasao a rakurak ket arigna mangipaspasimudaag ti shoot-on-sight wenno shoot-to-kill nga addang, uray awan pay ti naiparuk-at a warrant of arrest manipod iti korte.
Maipalagip nga iti napalabas a lawas, inrekomendar ti Department of Justice (DOJ) a mapilaan ti kaso nga homicide, kidnapping, ken illegal detention ni Ang ken ti 21 a pulis mainaig iti panagpukaw dagiti mammallot.
Inbatad ni Villareal nga agtalinaed ni Ang iti pagilian ken agtultuloy a makitinnulong kadagiti otoridad, ken nagballaag a dagiti nasao a rakurak ket mabalin a mangitunda ti pre-judgment iti kaso.
